„Þau eru bara eitthvað svo glöð, því þau eru svo mikið þau sjálf” : sýn starfsmanna á reynslu ungmenna í hinsegin félagsmiðstöðvastarfi.

Þetta lokaverkefni er til B.A. – gráðu í tómstunda- og félagsmálafræði frá Háskóla Íslands. Lokaverkefnið er rannsóknarskýrsla sem byggir á eigindlegri viðtalsrannsókn við fjóra starfsmenn í hinsegin félagsmiðstöð Samtakanna'78 og frístundamiðstöðvarinnar Tjarnarinnar sem stofnuð var árið 2016 og fræðilegri umfjöllun um viðfangsefnið. Markamið rannsóknarinnar er að kynnast nánar félagsmiðstöðvastarfi fyrir hinsegin unglinga, hvernig reynsla það er fyrir unglinga að taka þátt í félagsmiðstöðvastarfinu og hvaða gildi það getur haft fyrir þau. Í skýrslunni er að finna fræðilega umfjöllun um hinsegin fræði og hugtök, unglingsárin og sjálfsmyndina. Við tekur lýsing á viðfangsefni rannsóknarinnar sem eru Samtökin '78, félagsmiðstöðvar, frístundamiðstöðin Tjörnin og hinsegin félagsmiðstöðin. Viðtölin voru prentuð út og niðurstöður fengnar með þemagreiningu. Niðurstöður rannsóknarinnar skiptast í fjögur þemu sem lýsa þeirri reynslu sem starfsmenn telja að fáist með þátttöku í félagsmiðstöðinni. Þau þemu eru að tilheyra hóp, staður til að vera maður sjálfur á, að styrkja sjálfsvitund sína og að skapa félagslegt öryggi: starfsmaðurinn sem fagmaður og fyrirmynd. Með samantekt niðurstaðanna má álykta að þátttaka í hinsegin félagsmiðstöðinni gegnir veigamiklu og dýrmætu hlutverki fyrir unglinga og hefur mikið forvarnar- og uppeldislegt gildi fyrir þau